الاعداد للطفل
الطفل الاول: كل دقيقة تغيير للطفل.. وتحاول تخلي ريحته حلوة و الشمالات النوع الغالي والرودرات و ماترضاش تديرله دوش الا بي جونسن اند جونسن ولا شن اسم بلاه المهم هداكا الشامبو متع لا دموع بعد اليوم ..
الطفل الثاني: كل ثلاث ساعات فأكثر
الطفل الثالث: لما ريحته تطلع ... ومرت تدير روحها حولة وماشماتاش لين يقولولها الناس
القلق
الطفل الاول: من اول خبطة تجري عليه و تقيمه ... وتقعد تزازي و تتحسر و كله مني اني الي خليته نهاري الاحرف ...
الطفل الثاني:تقيمه لوضرباته سيارة
الطفل الثالث: احسن .... بش مرة تانية يتربى ... خلي تدهسه يستاهل
الاكل
الطفل الاول: اي حاجة تطيح عالوطا للكناسة طول ... وتقوله شمها الشيطان باش معاش ياكل حاجة من الوطا
الطفل الثاني: تغسلها بشوية مية ... تقولك الوطا مغسول بي ديتول .. والشيطان معاش يشم
الطفل الثالث: تمسحها فى حوايجها وا تزرقهاله
الطلعات
الطفل الاول: الملاهي... المراجيح..النادي ... وحلوة الصوف و السبول و العاب وهوا مروح
الطفل الثاني: النادي ... برا العب كورة والا قول لحد ايجي يلعب معاك وماتوجعليش راسي
الطفل الثالث: السوق ... برا الشارع قدامك هيج والا قعمز في الحوش وانهارك اسود تنادي حد
لما تتطلع الام
الطفل الاول: تسيبه مع اختها و تتصل تطمن عليه كل خمس دقايق ... وتعطي فيها معلومات و حالة
الطفل الثاني: تسيبه مع اختها... و هي على الباب اتفتكر اتسكر التليفون ومرات ضميرها يفيق واتقول لا
الطفل الثالث: تسيبه مع اى حد.. مع تحذير بان محدش يتصل بيها الا لو مات
فى الحوش
الطفل الاول: تقعد تدلع فيه وتزازي بيه لين يرقد وهواها جاه النوم و تغنيله صباح وفيروز وعبد الحليم لين يرقد
وبعد مايرقد تقعد تتفرج عليه تقول ياي محلاه زي الملايكة
الطفل الثاني: تدكله المرضعة بالسيف ... اشرب كان بتتمرقد مرقد السبعة
هالمفرخ الي حصلنا فيهم
وماتديرش عليه الا من وقت للتاني
الطفل الثالث: تتهرب منه علي قد ماتقدر ... رقد ولا انشاء الله جعله مارقد
لو بلع قرش
الطفل الاول: تطلب عمل اشعة للولد و يا حليللي كيف بندير ... كله منك يا تفيدة كله منك انتي خليتيه بروحه ويقعدو هادوكا الدموع يصبو وترفعه للمستشفى وتقعد تزازي وواقفة علي رجل وحدة لين تطمن انه مافيه شي
الطفل الثاني: تستني بشوية قلق انه يبلع الفلوس و تنهضم .. كانا قدر يهضمهم الله بارك وكانا ماقدرش تبعته معا فتحي ولد جيرانهم للدكتور الي في راس الزنقة
الطفل الثالث: تخصمه من مصروفه مع تسييق الجنان لمدة سبوع
ومرة أخرى مع احترامي لكل الامهات الليبيات